17 d'Abril del 2009

Fundación Real Uviéu 1926

L'Asociación d'Uvieistes Espíritu 2003 nació colos oxetivos d'algamar una mayor participación del uvieismu na xestión del so Real Uviéu y de fomentar l'uvieismu.

Dende entós trabayamos pa que l'afición uvieista tea'l so espaciu nel Real Uviéu y contribuya a devolvelo a al llugar que pola so historia y raigañu -y correspuende tanto a nivel deportivu como social.

Como daquella Espíritu 2003, la Fundación Real Uviéu 1926 surde del esfuerzu desinteresáu d'uvieistes de corazón,  colos mesmos fines y  el mesmo compromisu. D'ella esperamos que trabaye con independencia, sirviendo únicamente al Real Uviéu, por encima d'intereses de cualesquier índole y teniendo como prioridá les categoríes inferiores y la masa social que, añu tras añu sigue mostrando la so fidelidá al clú.

Dende Espíritu 2003 queremos mostrar el nuestru total sofitu a esti nuevu proyeuto, e invitamos a tolos estamentos del Real Uviéu, de la ciudá d'Uviéu y d'Asturies a collaborar nel so desendolcu.

Dende güei ponémonos a disposición de la Fundación, confiando qu'esta iniciativa, col sofito de toos, algame los sos oxetivos, convencíos de que la so suerte sedrá la del Real Uviéu.

¡Volveremos!

Xunta Direutiva d'Espíritu 2003

[ver más noticies atrasaes]