Asociación d'Uvieistes 'Espíritu 2003'

ASOCIACIÓN D’UVIEISTES
“ESPÍRITU 2003”

Lo sucedíu al rodiu’l Real Uviéu, sobremanera no que tien que ver colos acontecimientos del branu del 2003, traxo una reacción social que superó con muncho lo que s’entiende por fidelidá y amor a unos colores. La reacción del uvieismu plasmó, y foi tan grande que se convertió nún elementu básicu pa d’algamar l’oxetivu de que nun desapaeciera la entidá, dalgo que diba ser imposible ensin ello.

Aquel movimientu social que fizo que nacese lo que güei conocemos como “l’espíritu del 2003”, llegó al mundu del fútbol y ye un exemplu perbonu de que l’afición azul pue y tien que desempeñar un papel importante nel funcionamientu de la sociedá independientemente de la so forma xurídica y del repartu aicionarial.

La desilusión que foi acabando cola gracia de l'afición azul énte’l procesu de desaniciu en munchos ámbitos, reflexa lo que pue llegar a ser el Real Uviéu nos últimos tiempos y gláyamos a facer esti movimientu que nun naz escontra naide y sí col enfotu de xuntar, pa que, n’atropando fuerza de tolos sectores del uvieismu y enfotaos en recuperar aquel dormíu “espíritu del 2003”, l’afición vuelva ser ún de los pegollos fundamentales nos que se sofite la esistencia’l Real Uviéu.

L'Asociación d’Uvieistes “Espíritu 2003”, naz con munches idees y cola esperanza de qu’apurran munches más los que s’axunten a un proyectu nel que toos van tener voz y votu pa, ente toos y en pocu tiempu, ser a recuperar la ilusión y que’l Real Uviéu torne a ser lo que foi y, nel futuru, atropando cuantes más aiciones meyor, ser ha tener representación llegal constante nel clu.

Como primer pasu, y pendientes de lo que se decida na Xunta Xeneral Estraordinaria de l’Asociación que tendrá de celebrase nel Auditoriu Príncipe Felipe’l próximu mes d’avientu, van poder asociase los qu’anguaño seyan abonaos y/o aicionistes del Real Uviéu. Tolos detalles d’inscripción, van anunciase oportunamente.

Ta naciendo una manera nueva de vivir l’uvieismu, viva, gayolera, eficaz, ensin engarradielles y abierta a tolos uvieistes.

¡CONTAMOS CONTIGO!

+ >