RESUMEN DEL CONCEYU XENERAL ORDINARIU

L’Asociación d’Uvieistes Espíritu 2003, aconceyada nel conceyu del pasáu 30 payares, acordó, por unanimidá de los presentes, la creación d’una Xunta Provisional pa suceder a la Direutiva saliente, col envís de desarrollar una candidatura en forma a les necesidaes qu'entienden los sos Asociaos.

Dicha Xunta Provisional asumirá'l desarrollu de les actividaes que veníen realizándose y va afondar nes llinies xenerales marcaes dende'l nacimientu de l’Asociación: el fomentu del uvieismu y la so participación na xestión del nuestru Real Uviéu.

Nel conceyu presentáronse delles dificultaes que l'Asociación alcontró nel so desarrollu, entre les que tan los emparamientos p'acceder a los medios de comunicación, y pa ser escuchaos por entidaes, como'l nuestru Real Uviéu o l'Ayuntamientu d’Uviéu. Esta foi una de les principales causes alegaes pola Xunta Direutiva saliente pa la so dimisión y toes elles fueron aceptaes polos socios.

Dióse cuenta de les aiciones realizaes a lo llargu d’esti cursu pola Xunta Direutiva y del estáu de los contactos manteníos con delles instituciones como la FADE, el Real Uviéu, l’Ayuntamientu, los grupos políticos con representación nel Ayuntamientu d’Uviéu, el PP, el PSOE y l’Asamblea de Ciudadanos por la Izquierda, l’APARO y delles Peñes del Real Uviéu y asociaciones con fines talos a los nuesos de dellos equipos de fútbol del Estáu Español.

Tamién llevóse a cabu l'aprobación de les cuentes correspondientes al exerciciu 2006-2007, que presenten un saldu positivu.

Aprobóse l'apertura d'un foru públicu n’Interné, que fomente la participación de les persones que -yos pete nes actividaes de l’Asociación, independientemente de la so condición d’asociaos.

Valoróse l’estáu de los proyectos en desarrollu, y aportáronse delles idees sobre'l desarrollu de les llinies d'actuación de los próximos meses, entre elles inclúyese la próxima Xunta Aicionarial del Real Uviéu, conviniendo convocase un nuevu conceyu de l’Asociación en próximes feches.

Pa finar, dende l’actual Xunta Provisional, queremos mostrar el nuestro total agradecimientu a les persones que formaron davezu parte de la Xunta Direutiva al frente de l’Asociación d’Uvieistes Espíritu 2003, pol so esfuerzu desinteresáu y el so constante trabayu nestos difíciles tiempos que vive l’uvieismu, agradeciendo tamién el so interés en siguir participando activamente na nuestra Asociación, interés al qu'esperamos vengan a sumase tolos uvieistes qu'aspiren a algamar un Real Uviéu nel que la so voz seda sentida.

Atentamente,

Xunta Provisional - Asociación d’Uvieistes Espíritu 2003

< -                                                                                      + >