21 de Xineru del 2008
Campaña: El R. Uviéu nes Escueles
L'Asociación d'Uvieistes Espíritu 2003 quier dar conocencia a los sos asociaos y a tol uvieismu en xeneral, que --siguiendo'l so oxetivu estatutariu de fomentar l'uvieismu-- dende güei, llunes 21 de xineru, l'Asociación va facer llegar a les escueles de primaria de la ciudá d'Uviéu un total de 400 invitaciones pa caún de los partíos de la lliga regular que tendrán de celebrase nel Carlos Tartiere.
Na Asociación d'Uvieistes “Espíritu 2003” tamos xuros qu'averar a los habitantes más pequeñinos de la ciudá al nuestro estadiu, tien de sirvir pa fomentar-yos los perguapos valores que conlleva'l deporte, delles vegaes demostraos y defendíos per l'uvieismu, y qu'ensin dubia son tamién sinónimu del Real Uviéu.
N'Espíritu 2003 tamién tamos convencíos que, asina, estos escolinos van entamar a sentir el mesmo amor y arguyu que sentimos polos nuestros colores, y tendrán d'entender el prestixu social, simbolóxicu y deportivu, qu'esta entidá vien manteniendo a lo llargu de los sos 83 años d'hestoria a pesar de toes les adversidaes, y que deseamos que tea continuidá nellos.
La xestión del repartu d'entraes va tar a cargu de “Espíritu 2003” en collaboración col Real Uviéu. Inicialmente l'oxetivu ye distribuiles per toes les escueles y colexos de la ciudá; dempués d'esta primera fase, vamos procurar ofrece-yos al resto de neños asturianos, la posibilidá de disfrutar nel Carlos Tartiere d'un día pa enxamás lo escaecer.
Esti ye'l primer proyeutu de l'Asociación Espíritu 2003 que cristaliza en collaboración col Conseyu d'alministración del Real Uviéu, y esperamos qu'abra camín pa otros seis proyeutos nos qu'agora los miembros de l'Asociación Espíritu 2003 tamos trabayando.
Espíritu 2003 quier invitar a participar d'este proyeuto (y de los que pronto esperamos presentar) a tolos uvieistes, sabiendo que, ensin la so collaboración, llevalos a cabu va ser munchu más complicáu, y lo que ye más importante, nun tendría nengún sentíu.
Si tas interesáu/a en collaborar col proyeuto, nun lo dudes y ponte en contautu con nos en dalguna d'estes direcciones de corréu:
o
Asociación d'Uvieistes "Espíritu 2003"
Apartadu de Correos 5.108
33080 - Uviéu
¡Xuntos Volveremos!
Asociación d'Uvieistes "Espíritu 2003"
Pa ver el dípticu ye necesariu'l programa Adobe Reader. Si nun lo tienes, pues baxalu de baldre dende esti enllace:
© Asociación d'Uvieístes "Espíritu 2003", 2008.
