Asociación d'Uvieistes 'Espíritu 2003'

2 de Xunu del 2008

Güei, más que nunca,
¡Puxa Uviéu!

Los uvieistes entrugámonos qué tuertu miraríanos; cómo yes posible que, cuatro años dempués, volvamos ver repetía la mesma película.

Ayeri, venticuatro mil voces nel Tartiere y milenta más na distancia volvieron, otra vuelta más -y van ¿cuántes?-, a rompese entecortaes por llárimes d'impotencia. Milenta corazones azules, desgarraos pola desesperación. Non, nun ye xustu. Nun somos a merecelo.

Tolos miembros de l'Asociación d'Uvieistes Espíritu 2003 sentimos lo mesmo que tu que, otra vuelta más, dexastete'l gargüelu animando al equipu de nueso; que, otra vuelta más, viste como otra permala planificación xunto a una dosis de la nuesa mala suerte davezu destrozó otra vuelta'l nueso suañu. Xuntemos la nuesa tristura a la tuya, porque ye la nuesa, la de tolos qu'amamos al Real Uviéu. Tamos tan rotos y fundíos como tu, como tola familia azul.

Pero... ¡Somos uvieistes! Si en 2003 nun pudieron con nosotros; si nun abandonamos al Real Uviéu cuando munchos diéronlo por muertu y demostramos que XUNTOS podíemos; si siguimos caleyando estos años poles llamuergues con arguyu, valor y garra... ¡¡Agora nun vamos tirar la toalla!!

Agora -quiciabes en cuantes que pasen dellos díes y ya en fríu-, ye la hora de pidir responsabilidaes. De siguir lluchando pa que la nuesa voz -fiel y, agora, afónica- seya tenía en cuenta nel día a día de la xestión del Club para evitar desastres como los que fuimos a vivir dafechu estos últimos años.

Y pa eso necesitamos tar más xuníos que nunca, aglutinaos al rodiu de los nuesos colores. Pa eso nació y vive l'Asociación d'Uvieistes Espíritu 2003. Pa eso vamos siguir lluchando: ¡XUNTOS PODEMOS! ¡¡VOLVEREMOS!!

Y mal que güei a naide nun nos apetez falar d'otres coses, ye xustu comentar que les ventes na nuesa mesa del llibru "El Espíritu de 2003" fueron perbuenes y que contamos cola agradable sorpresa de la visita de Luis Miguel Areda, Luismi, autor d'ún de los capítulos y uvieista de pro, que firmó dellos exemplares.

El llibro, imprescindible na biblioteca de cualesquier uvieista, sigue a la venta nes principales llibreríes d'Asturies.

< - + >