Fueron tres díes d’un trabayu intensu, pero tamién d’un uvieismo puru, del trabayu d’eses persones que daríen cualesquier cosa solo pol placer y la recompensa de collaborar col so club, col Real Uviéu.

L’Asociación d’Uvieistes "Espíritu 2003" fizo’l llamáu pidiendo ayuda pa un nuevu proyeuto, reubicar los asientos azules del Carlos Tartiere de manera que se pudiere lleer na grada REAL OVIEDO, y los aficionaos azules una vuelta más (y nun se sabe cuantes van) nun fueron a fallar.

Dende'l primer día trabayóse a un ritmu peraltu, tanto que lo que pensábamos que nos diba llevar cinco díes, ficímoslo en tres.

Dende esta web, queremos dar les gracies a toles persones que pasaron a sudar la gota gorda nel Tartiere nestos díes, ensin elles nun habría sío posible.

Tamién agradecemos l’interés qu’ algamó la iniciativa ente l'afición, y los sofitos recibíos, asina como a toles persones que -yos prestare venir pero nun pudieron por dellos motivos.

Nun mos escaecemos del Real Uviéu, poles facilidaes que mos dieron pa llevar este proyeuto a cabo ensin contratiempos.

Espíritu 2003 somos toos, somos l'afición que no abandonamos al nuestru equipu cuando ello yera  la opción más fácil, somos les persones qu'emplegamos el nuestru tiempu llibre en collaborar en cualesquier cosa tando bien xuros que lo único que vamos algamar ye la satisfaición de ver el trabayu bien fechu, d’aportar el nuestru granu d’arena al retornu del Real Uviéu a la categoría de la qu'enxamás debió salir, la Primera División.

¡¡XUNTOS VOLVEREMOS!!
¡¡PUXA UVIÉU!!