Mañana vienres, día 26 de marzu de 2010, coincidiendo col 84º cumpleaños del Real Uviéu, l'Asociación de’Uvieistes Espíritu 2003 entama, otru añu más, el plantíu d'un nuevu árbol nel Bosque Uvieista.

Anguaño vamos cuntar cola presencia, amás de la Conceyalía de Parques y Xardinos del Aytu. d'Uviéu, que como siempres emprestenmos la so total collaboración, y de miembros del club, con unos invitaos bien especiales a los que quixímos conceder l'honor de llantar l'árbol númberu 84, y que creemos que simbolicen a la perfección l'espíritu de llucha, d'arguyu, valor y garra, y de futuru que'l Real Uviéu tien d'amosar siempres nel so duru camín escontra'l llugar que-y correspuende, la añorada Primer División, y que son: la Peña Azul Michu (en representación del nuesu ex-xugador Miguel Pérez Cuesta, Michu, qu'anguaño dio al mundu una lleición d'honestidá y fidelidá probablemente ensin precedentes nel mundu del fútbol) y un equipu de les categoríes inferiores del club (como representación del Requexón, que ye y va ser el nuesu futuru).

Esperamos a tolos oviedistas a los que-yos preste ser testigos d'esti actu, pequeñu en fórmala pero grande nel significáu, y de camín ayudar a replantar los (pocos yá) árboles que nun aguantaron el pasu d'esti crudu iviernu.

PUXA UVIÉU